“هوما كيغلاو وانت كترخص “

“هوما كيغلاو وانت كترخص “
بقلم - زهرة الطاهري
الأربعاء 27 يوليوز 2022

غلاوْ كلشي
وزادو فيه كْثار من النص
وانت مازادوك والو
غلاوْ كلشي
وانت غير كَتْبَحصص
علاوْ كلشي
وأنت خلاوك فالضص
كيف دير تعيش بهاذ الصالير البسيط
تْعيا ماتحسب
وتا درهم مايشيط
فالأول د الشهر ماتلقى ماتَاكُل
تعيا ماتسلف
وحياتك كلها معلقة بخيط
غلاو كلشي وزادو فجميع المواد
انت كتضعاف وجيبهم كيغلاض
هوما كيتزادو
وانت كتنقص
هوما كيغلاو
وانت كترخص
هوما حالهم كيزيان
وانت كتكفس
تتخلص اليوم غد يخوا الجيب
تعيا تقتاصد وتدخل فحيط
تفك كريدي البقال
تلقى على عنقك شريط
تخلص الما والضو
مايبقاش ليك باش تجيب الحليب
يبكيوْ العيال
على كسوة العيد وعلى خْص وخص…
والفلوس اللي عندك
ماكتسواش ربطة د الخس
الشاف ديما يغوت عليك
إيلا جات فيك جات فيك
هذي هي الخدمة
وهذا هو السْميك في دولة تاكْلك
وماتحميك
كيف دير تعيش يالعامل البسيط
تعيا تخدم
والنُص د الشهر تكملوا بالجوع
ديما ضارباك الشمس
وضاربك القهر
وضاربك البرد
وايلا هدرت تْطرد
الشاف مكرفس عليك
والصالير مَحَاديش
خدام بحال العبد
ومعندكش باش تعيش
هذي هي الخدمة
في دوله تعطيها كلشي
وتا حاجة ماتعطيك
وتخلصك بزوج ريال
وفي الاّخر ترميك